FKP ta introdusí "Traha bo Sita Online"
FKP ta bai introdusí e sistema di "Traha bo Sita Online" pa klientenan.
Ya for di aña pasá durante di "lockdown" nos a kuminsa buska formanan kon por atendé ku kliente
tumando na kuenta Distansha Sosial i evitando aglomerashon den espasio públiko di FKP.
Durante e periodo di aña pasá nos a bin ku formularionan ku klientenan por yena riba nos website pa hasi petishon di diferente servisio i pregunta ku nan por tin riba nan status.
Tambe nos a introdusí un Business WhatsApp kaminda klientenan por app i drenta den kontakto ku FKP. Via di e WhatsApp aki ta guia e kliente na e diferente formanan di haña e servisio ku nan ta pidi.
Traha sita sin sali for di kas
Nos a pone tambe un formulario kaminda e kliente por pidi un sita ku FKP i nos ta tuma kontakto bèk pa duna e kliente un fecha pa bin FKP.
No obstante ku esaki a yuda hopi, ta resultá ku e no ta hopi efisiente ya komo ku diferente departamento ta traha sita pa nan kliente i no tin un kordinashon di kuantu kliente ta bin FKP i di spreekhoknan disponibel. Ku konsekuensha ku kliente tin ku wárda den sala tóg pa nan burt.
Un stap mas den direkshon di inovashon
Tumando na kuenta tur esaki i e hecho ku FKP tambe ke dal un stap dilanti riba formanan mas digital pa komuniká ku su klientenan a buska un solushon pa e kliente mes por traha su sita riba e dia i e fecha ku ta mihó pe, kon tal ku esaki ta disponibel.
Despues di ku nos a buska un sitema ku ta fit mas na e situashon di FKP a hasi un temporada di test ku e departamentonan konserní.
I awor nos ta kla pa ban introdusí e sistema na públiko.
Rol di tur trahadó
Na promé lugá komo trahadó di FKP nos ke pa bo ta na altura di inovashonan ku ta hasi pa ku klientenan.
Tambe ta e intenshon ku tur trahadó di FKP mester por splika un konosí of famia ku puntré, kon e por traha un Sita Online.
Semper por aserká e departamento konserní, pa kua ke traha sita, pa mas informashon.
Kon ta traha un Sita Online
E sistema ta simpel.
Ta subi e website di FKP i ta klik riba TRAHA BO SITA ONLINE
esaki ta hibábo na e pagina kaminda por kis e departamento ku kier traha un sita kuné.
Aki e kliente ta mira e instrukshon i dokumentonan nesesario ku lo e tin mester pa traha e Sita Online.
E boton aki ta hiba na e kalender di e departamento ku e kier traha sita kuné.
Aki e mester sigui e instrukshonan ku kada kalender tin i e ta traha su sita riba e fecha i e orario ku e ke.
Si pa un of otro motibu e kliente ke kansela su sita e por hasi esaki 24 ora promé ku e sita.
Mester bisa si, ku esaki ta UN manera mas pa aserka FKP!
E otro sistemanan via telefòn, E-mail, WhatsApp ta sigui vigente!